វិវាទរោងចក្រSL នឹងអាចដោះស្រាយបញ្ចប់នៅសប្តាហ៍ក្រោយ
ចុះផ្សាយនៅថ្ងៃ៖ កែប្រែថ្ងៃទី៖
កម្មករកាត់ដេរមួយចំនួននៃរោងចក្រ SL បានធ្វើកូដកម្មចូលដល់ថ្ងៃទី ៤ ហើយមកដល់ថ្ងៃសៅរ៍នេះ ដើម្បីទាមទារឲ្យក្រុមហ៊ុនដោះស្រាយល័ក្ខខ័ណ្ឌការងារចំនួន៤ចំណុច ដែលពួកគេបានស្នើសុំជាយូរមកហើយ ហើយមិនទាន់មានការឆ្លើយតប។ ការទាមទាររបស់កម្មករ បានធ្វើឡើង ខណៈដែលការចចារជាផ្លូវការមួយ អាចនឹងត្រូវគេរៀបចំឡើងនៅសប្តាហ៍ក្រោយ ដើម្បីបញ្ចប់វិវាទដ៏អូសបន្លាយនៃរោងចក្រកាត់ដេរមួយនេះ។
កម្មករ កម្មការិនី នៃរោងចក្រកាត់ដេរ SL ដែលបានអះអាងថា មានគ្នាប្រមាណជា ១ពាន់នាក់ បានបន្តធ្វើកូដកម្មដោយបិទផ្លូវ៣៧១ នៅថ្ងៃសៅរ៍ជាបន្តទៀត ដើម្បីតវ៉ាទៅនឹងល័ក្ខខ័ណ្ឌ ការងារមួយចំនួន ដែលពួកគេយល់ថា បានរំលោភទៅលើច្បាប់ការងារ។ ការតវ៉ានេះបានធ្វើឡើងចាប់ពីថ្ងៃអង្គារទី០៨ តុលា មក គឺបន្ទាប់ពីពួកគេបានវិលត្រលប់មកពីស្រុកកំណើត បន្ទាប់ពីពិធីបុណ្យភ្ជុំបិណ្ឌត្រូវបញ្ចប់ ហើយបន្តសកម្មភាពទាមទារឡើងវិញដែលត្រូវបានផ្អាកកាលពីមុនបុណ្យភ្ជុំបិណ្ឌ។
លោក ឈួង ឈាង តំណាងសហជីពកម្មករនៃរោងចក្រ SL បានប្រាប់វិទ្យុបារាំង RFI ថាពួកគេបន្តទាមទារបួនចំណុច គឺមិនត្រូវកាត់ប្រាក់ខែពួកគេនៅពេលធ្វើកូដកម្ម ដកលោក
មាស សុថា ទីប្រឹក្សារោងចក្រដ៏មានអំណាច ដែលកម្មករចោទថា បានជាប់ពាក់ព័ន្ធបញ្ហាមិនអាចដោះស្រាយចេញ ស្នើសុំឲ្យដកពាក្យបណ្តឹងប្រឆាំងកម្មករ និងប្រាក់ថ្លៃបាយប្រចាំថ្ងៃ។
កាលពីខែមុន កម្មករសរុបប្រមាណ ៦ពាន់នាក់ បានចុះដើរតាមផ្លូវជាញឹកញាប់ ដើម្បីស្វែងរកអន្តរាគមន៍ពីស្ថាប័នពាក់ព័ន្ធនានារបស់រដ្ឋ ក៏ប៉ុន្តែ មិនមានលទ្ធផលឆ្លើយតបទៅនឹងការចង់បានរបស់កម្មករឡើយ។ តាមការឲ្យដឹងពីមន្ត្រីសហជីព មកទល់ថ្ងៃសៅរ៍នេះ កម្មករមួយចំនួនបានចល័តទៅធ្វើការនៅរោងចក្រផ្សេង ឬធ្វើសំណង់ ខ្លះមិនទាន់ត្រលប់មកពីស្រុកកំណើត បន្ទាប់ពីបុណ្យភ្ជុំបិណ្ឌ។ កម្មករប្រមាណជា៣០ភាគរយ បន្តចូលធ្វើការនៅរោងចក្រSLដដែល ហើយមួយចំនួនទៀត បន្តធ្វើកូដកម្ម។
រវាងអ្នកសហជីព និងតំណាងរោងចក្រតែងបានចោទប្រកាន់គ្នាទៅវិញទៅមក គឺរោងចក្រចោទសហជីពថា បានគាបសង្កត់កម្មករមិនឲ្យចូលធ្វើការវិញ នៅពេលដែលមានការ
ដោះស្រាយចំណុចជាច្រើនកន្លងមក។ ក៏ប៉ុន្តែ អ្នកសហជីពបានចោទទៅរោងចក្រវិញថា បានព្យាយាមទិញកម្មករឲ្យផ្តាច់ខ្លួនពីសមាជិកភាពសហជីពស៊ីខាវឌូ ដែលដឹកនាំដោយលោក អាត់ ធន់ ខណៈដែលការបើកប្រាក់ឈ្នួលកាលពីខែកញ្ញាកន្លងមក ត្រូវថៅកែកាត់យកអស់ជាច្រើន ដោយមូលហេតុចូលរួមធ្វើកូដកម្មដែលធ្វើឲ្យក្រុមហ៊ុនមានការខាតបង់។
ទោះជាយ៉ាងនេះក្តី ការចចារមួយជាផ្លូវការ នឹងអាចកំណត់ធ្វើនៅថ្ងៃច័ន្ទសប្តាហ៍ក្រោយ ខណៈដែលការជួបជជែកគ្នាមុនៗ ដើម្បីស្វែងរកដំណោះស្រាយត្រូវបានច្រានចោលដោយភាគីថៅកែ។
កាលពីថ្ងៃទី ៩ខែតុលា កន្លងទៅនេះ ទីស្តីការគណៈរដ្ឋមន្ត្រីបានចេញលិខិតមួយ ដោយបង្គាប់ឲ្យមានការចរចាគ្នាឡើងវិញរវាងសហជីពនិងកម្មករ SL ដោយមិនមានការរំខានពីជនទីបីដែលមានឥទ្ធិពលដល់ផ្អាកការអនុវត្តន៍ដំណើរការរបស់តុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ