កម្មករ​មក​ធ្វើការ​នៅ​ភ្នំពេញ​ក្នុង​ចន្លោះ​ពី​២០​ទៅ​៣០​%​អាច​មិន​ត្រឡប់​ទៅ​បោះឆ្នោត​

កម្មករ​ច្រើន​ម៉ឺននាក់​ដែលមកធ្វើការនៅភ្នំពេញ​អាច​មិនទៅបោះឆ្នោត​នៅថ្ងៃអាទិត្យ​ស្អែកទី៣​មិថុនា២០១២
កម្មករ​ច្រើន​ម៉ឺននាក់​ដែលមកធ្វើការនៅភ្នំពេញ​អាច​មិនទៅបោះឆ្នោត​នៅថ្ងៃអាទិត្យ​ស្អែកទី៣​មិថុនា២០១២ RFI

ក្នុង​​ខណៈពេល​​ដែល​​ប្រជាជន​​ច្រើន​​លាន​​នាក់​​ត្រៀម​​ខ្លួន​​ទៅ​​បោះឆ្នោត​​នៅ​ថ្ងៃ​​អាទិត្យ​​ស្អែក​​នោះ ​កម្មករ​​ច្រើន​​ម៉ឺន​​នាក់​​ដែល​​ឡើង​​មក​​ធ្វើការ​​នៅ​​ទីក្រុង​​ភ្នំពេញ​​អាច​​មិន​​ត្រឡប់​​ទៅ​​បោះ​ឆ្នោត​​នៅ​​ស្រុក​​កំណើត​។​ បើយោង​​តា​ម​មន្រ្តី​សហជីព​កម្មករ​​កាត់ដេរ​​ក្នុង​ចន្លោះ​ពី​​២០​​ទៅ​​​៣០​​%​​អាច​​មិន​​ទៅ​​បោះឆ្នោត។​ មូលហេតុ​​ចម្បង​​គឺ​​ដោយសារ​​បញ្ហា​​ហិរញ្ញវត្ថុ។​

ផ្សាយពាណិជ្ជកម្ម

របាយការណ៍​របស់​គណៈកម្មាធិការ​ជាតិ​រៀបចំ​ការ​បោះឆ្នោត​បានបង្ហាញ​ថា ប្រជាពលរដ្ឋ​ខ្មែរ​ដែល​មា​នឈ្មោះ​ទៅ​បោះឆ្នោត​ជ្រើសរើស​ក្រុមប្រឹក្សា​ឃុំ​សង្កាត់​នៅ​ថ្ងៃ​ទី​៣​ខែ​មិថុនា​ស្អែក​នេះ​ មាន​ចំនួន​៩​លាន​នាក់។ ប៉ុន្តែ​ជាក់ស្តែង មិនមែន​ប្រជាជន​ទាំងអស់​ទៅ​បោះ​ឆ្នោត​នោះ​ទេ។ អ្នក​ដែល​សម្រេ​ចចិត្ត​មិន​ទៅ​បោះឆ្នោត​ភាគ​ច្រើន​គឺ​កម្មករ​ដែល​ឡើង​មក​ធ្វើការ​នៅ​ទីក្រុង​ភ្នំពេញ។
លោក អាត់ ធន់ ប្រធាន​សហភាព​ការងារ​កម្ពុជា​ដែល​ធ្វើការ​យ៉ាង​ជិតស្និទ​ជា​មួយ​កម្មករ​កាត់​ដេរ​​​អស់​រយៈពេលជាង​១០​ឆ្នាំ​មក​ហើយ​នោះ បាន​និយាយ​ប្រាប់​នៅ​ថ្ងៃ​សៅរិ៍​នេះ​ថា កម្មករ​កាត់​ដេរ​​ក្នុង​ចន្លោះ​ពី​២០​ទៅ​​៣០​% ​អាច​មិន​ទៅ​បោះឆ្នោត​។ មូលហេតុ​គឺដោយសារ ពួកគេ​ប្រឈម​នឹង​បញ្ហា​ហិរញ្ញ​វត្ថុ​ផ្ទាល់​ខ្លួន​ម្យ៉ាង​និង​ម្យ៉ាងទៀត គឺ​ដោយសារ​ក្រុមហ៊ុន​មួយចំនួន​​បាន​អនុវត្ត​នយោបាយ​លើក​ទឹក​ចិត្ត​ដំឡើង​ប្រាក់​ខែ​ទ្វេ​ជូន​ដល់​កម្មករនៅថ្ងៃ​បោះឆ្នោត​។

លោក អាត់ ធន់ បាន​ស្តី​បន្ទោស​ថា៖«ថៅកែ​មិនគួរ​ទាក់ទាញ​កម្មករ​អោយ​នៅ​បន្ត​ធ្វើការ​តាម​រយៈ​​ការ​​ដំឡើង​ប្រាក់​លើក​ទឹកចិត្ត​នោះ​ទេ រីឯ​កម្មករវិញពួកគេ​ត្រូវ​ធ្វើ​ដំណើរ​ទៅ​បោះឆ្នោត​ដើម្បី​​​អភិវឌ្ឍ​ភូមិ​ឃុំ​របស់​ខ្លួន»។

ប្រទេស​កម្ពុជា​មាន​កម្មករ​​កាត់ដេរ​ចំនួន​ប្រមាណ​ជា​៤​សែន​នាក់។ កម្មករ​​ដែល​បម្រើការ​ក្នុង​វិស័យ​កាត់ដេរ​នៅ​ទីក្រុង​ភ្នំពេញ​ភាគ​ច្រើន​មក​ពី​ជនបទ​។ ​ក្រសួង​ការងារ​ធ្លាប់​បាន​ប្រកាស​អោយ​កម្មករ​កាត់ដេរ​និង​កម្មករ​ក្នុងវិស័យផ្សេង​មាន​សិទ្ធិ​ឈប់​សម្រាក​ចំនួនពី​២​ទៅ​៣​ថ្ងៃ​ដើម្បី​ធ្វើ​ដំណើរ​ទៅ​បោះឆ្នោត​នៅ​តាម​បណ្តា​ខេត្ត​នានា​មែន។ ប៉ុន្តែ​កម្មករ​ខ្លួន​ឯង​ទេ​ដែល​សុខចិត្ត​មិនទៅបោះឆ្នោត​ដោយសារ​តែ​បញ្ហហិរញ្ញវត្ថុ​និង​ចម្ងាយ​ផ្លូវ​ឆ្ងាយ។

មិន​មែន​មាន​តែ​កម្មករ​ក្នុង​វិស័យ​កាត់ដេរ​ទេ​ដែល​មិន​ទៅ​បោះឆ្នោត​នោះ តាមពិត ​កម្មករ​មួយ​ចំនួន​​​ក្នុង​វិស័យ​ផ្សេង​ទៀត​ក៏​មិន​ទៅ​បោះឆ្នោត​ដែរ។ កញ្ញា ដាណែតបម្រើការ​នៅ​ក្នុង​ហាង​មួយ​​នៅ​ទីក្រុង​ភ្នំពេញ ដែល​ទើប​​មាន​អាយុ ១៨​ឆ្នាំ​នៅ​ឆ្នាំ​នេះ​និង​​ជា​លើក​ទី​មួយ​ដែល​ត្រូវ​បោះ​ឆ្នោត​​នោះ ​បាន​និយាយ​ប្រាប់នៅ​ថ្ងៃ​សៅរិ៍​នេះ​ថា កញ្ញា​សម្រេច​ចិត្ត​មិនទៅ​បោះឆ្នោត​នៅ​ក្នុង​ខេត្ត​កំពង់​ធំរបស់​នាង​ទេ​ពីព្រោះ​​កញ្ញា​មិន​ចង់​ចំណាយ​ប្រាក់កាស​អត់​ប្រយោជន៍។ ដាណែត​បាន​និយាយបន្តទៀត​ថា ប្រសិន​បើ​នាង​ទៅបោះឆ្នោត​ នាង​ត្រូវ​ចំណាយ​លុយប្រហែល​២៥​ដុល្លារ​អាមេរិក​សម្រាប់​ធ្វើ​ដំណើរទៅមក ដូច្នេះ​នាង​មិន​ទៅ​ទេ។ សន្លឹក​ឆ្នោត​របស់នាង​មាន​តម្លៃ​មែនប៉ុន្តែ​នាង​មិន​សូវ​មាន​លុយ​កាក់។

លោក គល់ បញ្ញា នាយកប្រតិបត្តិ​នៃ​អង្គការ​សង្កេតការណ៍​បោះឆ្នោត Comfrel បាន​ទទួល​ស្គាល់​ពី​ការ​លំបាក​ផ្នែក​ហិរញ្ញវត្ថុ​របស់​កម្មករ​​​មែន​ប៉ុន្តែ​លោកអំពាវ​នាវ​អោយ​កម្មករ​ទាំងអស់​នាំគ្នា​ទៅ​បោះឆ្នោត​ដើម្បី​ក្លាយ​ទៅ​ជា​ម្ចាស់អំណាច។

លោក គល់ បញ្ញា បាន​អត្ថាធិប្បាយ​បន្ត​ទៀត​ថា សម្រាប់​ការ​បោះឆ្នោត​លើក​ក្រោយ​ទៀត គណៈកម្មាធិការ​ជាតិ​រៀបចំ​ការ​បោះឆ្នោត​ គួរ​ពិចារណា​រៀបចំ​ការ​បោះឆ្នោត​តាម​បណ្តាញ​ប្រៃសណីយ៍​ឬ​តាម​រយៈ​ការ​សម្រួល​​អោយមាន​ការ​ចុះ​ឈ្មោះ​នៅ​ទី​កន្លែង​ស្នាក់​នៅ​បណ្តោះ​អាសន្ន។

សូម​បញ្ជាក់​ថា កាល​ពី​ការ​បោះឆ្នោត​ឃុំ​សង្កាត់​ឆ្នាំ​២០០៧​កន្លងមក​ មានប្រជាពលរដ្ឋ​​៦៧​%​បាន​ចូលរួម​ការ​បោះឆ្នោត​និង​ជាង​៧០%​សម្រាប់​ការបោះឆ្នោត​ជ្រើសរើស​តំណាងរាស្ត្រ​កាល​ពី​ឆ្នាំ​២០០៨៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI