យុវជន​ជាតិ​និយម​៤​នាក់​តុលាការ​ត្រូវ​​កាត់ទោស​ឲ្យ​ជាប់គុក​

ក្នុង​ចំណោម​ទណ្ឌិត​៤នាក់​នោះ ​មា​នម្នាក់​ជាមេក្រុម ឈ្មោះ Anton Vassiliev អាយុ​២៤ឆ្នាំ ​ ត្រូវ​ បាន កាត់ទោស​ឲ្យ​ជាប់គុក​យូរ​ជាងគេ ដល់​ទៅ២២ឆ្នាំ។ ចំណែក ៣នាក់​ទៀត ជា​និស្សិត ឈ្មោះ Constantin Kutcher អាយុ២០ឆ្នាំ ជាប់គុក​១៣ឆ្នាំ ឈ្មោះ Andrei Gordeiev អាយុ​២០ឆ្នាំដែរ ជាប់ គុក​១០ឆ្នាំ និង ឈ្មោះ Vladislav Poliakov អាយុ​២១ឆ្នាំ ជាប់​គុក​តិចជាង​គេ ត្រឹម៩ឆ្នាំ។

ក្រុមរបស់គេ មានឈ្មោះ​ជាតិនិយម​ត្រង់ៗ​ថា ៖ “ ចលនា​ស្វយ័ត​ ទប់ទល់​នឹងពួកណា​ដែល មិនមែន​ជាពូជស្លាវ“។

ទោស​របស់​គេ គឺ ក្នុង​ចន្លោះពេល ៥ខែ ពី​ថ្ងៃ​១៧ សីហា ឆ្នាំ២០០៨ ដល់​ថ្ងៃ ១៩ មករា ឆ្នាំ២០០៩ ពួកគេ បានប្រព្រឹត្ត នៅរដ្ឋធានីម៉ូស្គូ ឃាតកម្ម ៤ករណី និង បាន​បំផ្ទុះ​គ្រាប់បែក ចំនួន ៤កន្លែង គឺ​នៅ​តាម​ហាងលក់​ទំនិញ តៀម​កាហ្វេ ទីផ្សារ ២​កន្លែង នៅ​ជិតស្ថានីយ៍ Metro ដោយ​មកពី ម្ចាស់របស់វា មាន​ដើមកំណើត ខុស​ពី​ពូជស្លាវ។ ហើយ ដោយ​មក​ពី​ឃាតកម្ម និង ការបំផ្ទុះគ្រាប់បែក ទាំងនោះ បាន​អភ័ព្វធ្លាក់ខ្លួន​ស្លាប់ទៅ គឺពលរដ្ឋ ចិន កូរ៉េខាងត្បូង វៀតណាម ប្រទេសអាហ្វ្រិក Cap-Vert , Cameroun , Gabon ប្រទេស​តំបន់​អាស៊ី​កណ្តាល Kazakhstan និង Ouzbekistan។

មិនតែ​ប៉ុណ្ណោះ ពួកគេ ក៏បានប្រព្រឹត្ត​ឃាតកម្ម ១១ករណី ដែលមិន​សំរេច​ដូចចិត្ត។ ចៅក្រម​ក៏​បានកាត់ទោស​ពួកគេ តាមបទ​​ធ្វើ ចរាចរណ៍​ អាវុធ និងគ្រឿងផ្ទុះ ខុសច្បាប់ ប្រព្រឹត្ត​អំពើ​ចោរកម្ម និងឃោសនា​លិទ្ធិ​ស្អប់ជាតិ​ដទៃ។

បើ​តាមទិន្នន័យ របស់​មជ្ឈមណ្ឌល “ SOVA “ ខាងតាមដាន នា ៦ឆ្នាំ​ចុងក្រោយ អំពីការលេច​ចេញ​មក​នៃ អំពើហិង្សា​ពូជសាសន៍និយម”  ទោះបី​បាតុភាពនេះ ​រីករាលដាល ទៅ​កាន់​តំបន់​កាន់តែច្រើន​ឡើង​នៃ​ប្រទេស​រុស្ស៊ីក្តី ក៏​គេចាប់​សង្កេត​ឃើញ​ជា​លើកទី​១ មាន​ការស្រុតចុះ​ទៅវិញខ្លះៗ នៃចំនួន​អ្នកដែល​ធ្លាក់ខ្លួន​រងគ្រោះ។ យ៉ាងណាមិញ ​បើក្នុងឆ្នាំ ២០០៨ មានអ្នកធ្លាក់ខ្លួនស្លាប់ ដល់ទៅ ១០៩នាក់ និងរបួស ដល់ ៤៨៦នាក់ នោះ ក្នុងឆ្នាំ ២០០៩ ចំនួនស្លាប់​ ចុះមកនៅត្រឹម ជាង៦០នាក់ និងរបួស​តែ៣៣០នាក់។

តាមការកត់សំគាល់​នៃ​ប្រព័ន្ធផ្សព្វផ្សាយ នៅរុស្ស៊ី ពួកSkinhead ច្រើនតែ​វាយប្រហារ គឺ​នៅ​ចំ​កាលបរិច្ឆេទ​ណា ដែលវា​ត្រូវ​រងវិញ្ញាសា​ដើម្បី​ឡើង​ស័ក្តិ។ នោះ​មាន​ន័យថា បើអ្នក​រងគ្រោះ​ធ្លាក់ខ្លួន​ដល់ស្លាប់ ហើយ​រូបភាពនោះ ថែម​ទាំង​បញ្ចាំង​ដោយទូរទស្សន៍ នោះ​មេក្រុមវា ពេញចិត្ត និង​ដំឡើង​ឋានៈ​ដល់​អ្នកដែល​បាន បញ្ចេញ “ថ្វីដៃ“៕