កម្ពុជា

អ្នក​ភូមិបឹង​កក់​២​នាក់​ត្រូវ​បាន​ដោះលែង​ឲ្យ​នៅ​ក្រៅឃុំ​បណ្តោះអាសន្ន​

សមត្ថកិច្ច​ចម្រុះ​​​​វាយ​បំបែក​ហ្វូង​អ្នកតវ៉ា​ប្រមាណ​២០០​នាក់​នៅមុខ​សាលារាជធានីភ្នំពេញ​ក្នុង​ជម្ឡោះ​ដីធ្លី​នៅ​បុរីកីឡា​និង​បឹងកក់​
សមត្ថកិច្ច​ចម្រុះ​​​​វាយ​បំបែក​ហ្វូង​អ្នកតវ៉ា​ប្រមាណ​២០០​នាក់​នៅមុខ​សាលារាជធានីភ្នំពេញ​ក្នុង​ជម្ឡោះ​ដីធ្លី​នៅ​បុរីកីឡា​និង​បឹងកក់​ RFI/Siv Channa

តំណាង​​​អ្នក​ភូមិ​​បឹងកក់​២​នាក់​​ត្រូវ​បាន​​ដោះលែង​​ពី​​ពន្ធនាគារ​​ព្រៃ​ស​​ឲ្យ​​នៅ​ក្រៅ​ឃុំ​​បណ្តោះ​អាសន្ន​​វិញ​​កាលពី​​ល្ងាច​​ថ្ងៃ​​សុក្រ​​ម្សិលមិញ។​អ្នក​​ទាំង​ពីរ​​ស្ថិត​​ក្នុង​ចំណោម​​អ្នកភូមិ​​បឹង​កក់​១៥​នាក់​​ដែល​​ត្រូវ​បាន​​តុលាការ​​សម្រេច​​ឃុំ​ខ្លួន​​កាលពី​​ថ្ងៃ​ទី២៤​ឧសភា​ប៉ុន្តែ​នៅ​​មិន​ទាន់​​បាន​ទទួល​​ការ​កាត់ទោស​​នៅ​ឡើយ​​ទេ។​ ចំណែ​ក​ឯ​​ស្ត្រី​​អ្នកភូមិ​បឹង​កក់​១៣​នាក់​​ទៀត​​ដែល​​តុលាការ​​បាន​​កាត់​ទោស​​រួច​​ហើយ​​នោះ​នៅ​​មិន​ទាន់​​ត្រូវ​បាន​​គេ​​ដោះលែង​​នៅ​ឡើយ​​ទេ​។​ ការ​ដោះលែង​​​អ្នក​ភូមិ​​បឹងកក់​​ទាំង​ពីរ​​នាក់​​នេះ​​ ​​បាន​​ធ្វើ​ឡើង​​បន្ទាប់ពី​​ក្រសួង​យុត្តិធម៌​​បាន​​អន្តរាគម។​

ផ្សាយពាណិជ្ជកម្ម

រឿង​ភាគ​ដ៏​វែង​អន្លាយ​របស់​អ្នកភូមិ​បឹងកក់​ទំនងជា​ជិត​ដល់ទី​បញ្ចប់​ហើយ។ តំណាង​អ្នកភូមិ​បឹងកក់២នាក់​គឺ​លោក សៅ សារឿន និង​អ្នកស្រី លី ចាន់ណា​រី ត្រូវបាន​តុលាការ​រាជធានី​ភ្នំពេញ​សម្រេច​ដោះលែង​ឲ្យ​មាន​សេរីភាព​នៅក្រៅ​ឃុំ​បណ្តោះអាសន្ន​កាលពី​ល្ងាច​ថ្ងៃ​សុក្រ​ម្សិលមិញ។ ការដោះលែង​អ្នក​ទាំងពីរ​ឲ្យ​នៅក្រៅ​ឃុំ​បាន​ធ្វើឡើង​បន្ទាប់ពី​ក្រសួងយុត្តិធម៌​បាន​សរសេរ​លិខិត​ទៅ​តុលាការ​រាជធានី​ភ្នំពេញ​ឲ្យ​ពិនិត្យមើល​ឡើងវិញ​អំពី​សំណុំរឿង​អ្នកភូមិ​បឹងកក់។

យ៉ាងណាក៏ដោយ អ្នក​ទាំងពីរ​ត្រូវ​បានដាក់​ឲ្យ​ស្ថិតនៅក្រោម​ការត្រួតពិនិត្យ​របស់​តុលាការ​។ ពួកគេ​ត្រូវ​ទៅ​បង្ហាញខ្លួន​នៅមុខ​តុលាការ​សាលាដំបូង​រាជធានី​ភ្នំពេញ​រៀងរាល់៣សប្ដាហ៍​ម្ដង ហើយ​មិនត្រូវ​ផ្លាស់ប្ដូរ​លំនៅឋាន និង​ត្រូវ​ទៅ​បង្ហាញខ្លួន​នៅមុខ​ប៉ុស្តិ៍​រដ្ឋបាល​ស្រះចក ខណ្ឌ ដូនពេញ​ផងដែរ។ អ្នកភូមិ​ទាំងពីរ​នាក់​ត្រូវបាន​អាជ្ញាធរ​ចាប់ខ្លួន​និង​បញ្ជូន​នៅ​ពន្ធនាគារ​ព្រៃ​ស កាលពី​ថ្ងៃទី២៤ ខែឧសភា ដំណាលគ្នា​នឹង​ស្ត្រី​អ្នកភូមិ​បឹងកក់១៣នាក់​ដែលមាន​ទំនាស់​ដីធ្លី​នោះដែរ។ នៅ​មិនទាន់មាន​ដំណឹង​ល្អ​ពី​ស្ត្រី១៣នាក់​ដែល​កំពុង​ជាប់ពន្ធនាគារ​នោះ​នៅឡើយ​ទេពី​ព្រោះ​ពួកគេ​កំពុង​ជាប់​បណ្តឹងឧទ្ធរណ៍។ សាលាឧទ្ធរណ៍​គ្រោង​លើកយក​សំណុំ​រឿងនេះ​មក​បើកសវនាការ​នៅ​ថ្ងៃទី២៧មិថុនា​ខាងមុខ។

ក្រុមអ្នកតាមដាន​សំណុំ​រឿងនេះ​ចាត់ទុក​ការដោះលែង​អ្នកភូមិ​បឹងកក់​ទាំងពីរ​ថា​ជាស​ញ្ញា​ល្អ​មួយ។ លោក ចាន់ សូ​វ៉េ​ត មន្ត្រី​អ្នកស៊ើប​អង្កេត​របស់​ស​មា​គម​សិទ្ធិមនុស្ស​អាដ​ហុក បាន​សម្តែង​ក្តីសង្ឃឹម​យ៉ាង​មុតមាំ​ថា ស្ត្រី​អ្នកភូមិ​បឹងកក់​អាច​នឹង​ត្រូវគេ​ដោះលែង​ឲ្យ​មាន​សេរីភាព​វិញ​ក្នុង​ពេលខាងមុខ។ លោក​កត់សម្គាល់ថា មាន​សម្ពាធ​ច្រើនយ៉ាង​ដែល​ដាក់​ទៅលើ​រដ្ឋាភិបាល​ទាក់ទង​នឹង​បញ្ហា​នេះ។ សម្ពាធ​ទាំងនោះ​មានដូចជា​ការទាមទារ​របស់​អ្នកភូមិ​បឹងកក់​ផ្ទាល់ ការទាមទារ​របស់​ស​ង្គ​ម​ស៊ីវិល និង​របស់​សហគមន៍​អន្តរជាតិ ដែល​រដ្ឋាភិបាល​មិនអាច​រកហេតុ​ផល​មក​ពន្យល់​បានឡើយ។

យ៉ាងណាក៏ដោយនៅក្នុង​ជំនួប​ជាមួយលោកស្រី ហ៊ីល​ឡា​រីគ្លី​ន​តុ​នរដ្ឋមន្ត្រីការបរទេស​អា​មេ​រិក នៅ​ទីក្រុង​វ៉ាស៊ីនតោន​កាលពី​ថ្ងៃទី១២មិថុនា លោក ហោ ណាំហុង រដ្ឋមន្ត្រីការបរទេស​កម្ពុជា​បាន​ពន្យល់ថា ការចាប់ខ្លួន​អ្នកភូមិ​ទាំងនោះ​ដោយសារតែ​ពួកគេ​មិនមែនជា​អ្នកភូមិ​បឹងកក់​ពិតប្រាកដ​ហើយ​បាន​ប៉ុនប៉ង​បង្កបញ្ហា​មុនពេល​បោះឆ្នោត​ដោយ​ប្រើ​ឧបករណ៍​ដែល​អាច​សម្លាប់​​មនុស្ស​បាន​ប្រឆាំង​អាជ្ញា​ធរមាន​សមត្ថកិច្ច។

ដូច្នេះ​មានតែ​វិធានការ​ផ្លូវច្បាប់​ទេ​ទើប​អាច​ចៀសវាង​អំពើហិង្សា​បាន។ ទោះជា​យ៉ាងណា ប្រមុខ​ការទូត​កម្ពុជា​អះអាងថា គ្មាន​បរទេស​ណា​ស្រឡាញ់​ខ្មែរ​ជាង​ខ្មែរ​គ្នាឯង​ឡើយ។ លោក​បញ្ជាក់ថា ក្រសួងយុត្តិធម៌​កំពុង​ដោះស្រាយ​បញ្ហា​នេះហើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI