''Etats-Unis'' jamanaɲɛmɔgɔ kɔrɔ Donal TRUMP ka san naani baara kɛlen dɔw

Donal TRUMP n'a muso Melania Trump
Donal TRUMP n'a muso Melania Trump AP - Luis M. Alvarez
A kɛbaga : Issouf ZERBO
Sanga 4

A ka san naani sarati kɔnɔ, ''Etats-Unis'' jamana ɲɛmɔgɔ kɔrɔ Donald Trump ka layiduw ani a ka hakili kuraw de y'a kɛ jamanadenw ya sugandi san 2016.

Ganseli

Donal TRUMP hakilina jɔnjɔn kun ye ka ''Etats-Unis'' jamana wili ka jɔ ani k'a sankɔrɔta  diɲɛ kɔnɔ. A san 4 tɛmɛni kɔ, a ka baara caman ma jamanadenw ɲafa, nka baara caman ɲɛna, a fɛ. 

''Etats-Unis'' ka nafa de bɛ fɛn bɛ ɲa, o de kama, Donald Trump y'a ka sarati kɛ , Jago ni sɔrɔ ko fanfɛ, Donald Trump ya jija sinaya la ni Chine ye fɔ ka ɲagin bɛn jamana in ka feerefɛnw kan. O kɛra sababu ye bɛnkan kura sigira sanin feree ko kan. O wale ye nafa lase ''Etats-Unis'' cagɛda dɔw ma, nka a kɔlɔlɔ barika boɲɛna fana sabu la cagɛda caman bɔnɛna nafolo la. 

baarataɲan jigila ''Etats-Unis'' fɔ ka se 3.5 ma 100 sara la Trump sababu la. O hakɛ kun ma sɔrɔ a san 50 tɛmɛni na,  nka ''Covid 19'' bana nana, o baarataɲan jugu ya.

Donald Trump kun ye layidu ta ka a ka jamana kɛlɛcɛw lasegi so ani k'u senbɔ kɛlɛ lankɔnlow la, a yɛrɛ ka fɔ la. O bɛɛ ma se ka waleya, soridasi dɔw bɛ ''Afganistan'', caman yɛrɛ fana bɛ ''Irak''.

Donald Trump de kɛra ''Etats-Unis'' jamana ɲɛmɔgɔ fɔlɔ ye ka sigi ka fɔ kɛ ni ''Kim Jong Un'' ye, ''Corée du Nord'' jamana ɲɛmɔgɔ . Nka, laɲiniw m'a se ka dafa. A ye kunawolo sɔrɔ fan wɛrɛ fɛ sabala, a sera k'a kɛ arabu jamana dɔw ye ''Israél'' lakodɔn.

Donal TRUMP tun y'a latigɛ ka koko jɔ walasa ka kɛrɛfɛ jamanadenw bali ka don a ka jamana kɔnɔ, kɛrɛnkɛrɛneyala tungaladenw. Nka koko kilo 600 hakɛ de jɔra,  ''Etats-Unis ni Mexique'' dancɛ la.

''Etats-Unis'' jamanaɲɛmɔgɔ 45 na tile de la, siya woloma kofɔra ka tɛmɛ. Farafin dɔw fagali kɔ, wilikajɔw cayala kɔsɔbɛ jamana in kɔnɔ.