"Coronavirus" kɛlɛli bolociliw diɲɛ kɔnɔ

"Coronavirus" bolocifura "Pfizer ".
"Coronavirus" bolocifura "Pfizer ". AP - Esteban Felix

"Pfizer, BioNtech, Astrazeneca, Johnson & Johnson, Sinopharm, Sputnik V, Moderna" adw... Kabi koronaboloci furaw sɔrɔ la desanburu kalo tɛmɛnen na, bolociw bɛ ka kɛ diɲɛ kɔnɔ. A fanba bɛ ka kɛ nafolotigi jamanaw de kɔnɔ. Farafinna bolociw bɛ senkan nka alibi jamana caman ma furaji kelen  sɔrɔ. 

Ganseli

Farajɛla "Israël" de ye jamanaba ye min ka mɔgɔ boloci cayara kɔsɔbɛ. Kɛmɛ sara la mɔgɔ 61 ni tilan ɲɔgɔn bolocira ka ban. Kabi kunu karilon, nundatugulan don tɛ wajibi ye tuguni kɛnɛmalaw ra. Kalansow fana bɛna dayɛlɛ Israël. 

"Royaume-Uni" ye jamanaden 49 boloci kɛmɛ sara la. "Etats-Unis" ka mɔgɔ bolocita bɛ bɛn 39 ma kɛmɛ sara la. "Belgique, Norvège, Espagne ani Allemagne" jamanaw kɔnɔ, mɔgɔ 19 bɔɲɔgɔn boloci la kɛmɛ sara la. France b'u kɔfɛ ni mɔgɔ 18 ye. Nka o jamanaw kɔnɔ, mɔgɔ caman ye boloci ko fɔlɔ sɔrɔ filana ma kɛ u ra ban.

Farafin jamanaw kɔnɔ "Seychelles" de bɛ bɛɛ ɲɛ. Jamana in den 67 ni kɔ ye bolocifuraw sɔrɔ. Farafinna jamana tɔw kɔnɔ, "Maroc" ye mɔgɔ 12 ni tilan ɲɔgɔn boloci kɛmɛ sara la. "Rwanda, Ghana, Eswatini ani Sénégal",  mɔgɔ 2 bolocira kɛmɛ sara la.  

"OMS" ye hakilila min ta sanko koronaboloci fura sɔrɔko ka nɔgɔya jamanaw ye "COVAX", o de kɛra sababu ye jamana caman ye furajiiw sɔrɔ Farafinna. Nka alibi a bɛ jamana 20 bɔ minnu ma furajii kelen yɛrɛ sɔrɔ fɔlɔ. Jatɛw bɛɛ kɔ, Farafinna mɔgɔ 2 dɔrɔn de bolocira kɛmɛ sara la.