"Russie": sɔrasi minnu bɛ "Ukraine" ani "Crimée" dansɛw gɛrɛfɛ olu bɛna labɔ yen

Volodymyr Zelensky, Ukraine jamanakuntigi sɔrasi fini na, (Camacɛ la) ani jamana in kɛlɛcɛw.
Volodymyr Zelensky, Ukraine jamanakuntigi sɔrasi fini na, (Camacɛ la) ani jamana in kɛlɛcɛw. AP

Russie sɔrasi minnu bi "Russie" worodugunyanfan ni a tilebinyanfan fɛ, "Ukraine" ani Crimée dansɛw gɛrɛfɛ olu bɛna labɔ yen, ka daminɛ bi yɛrɛ ; "Russie" kana minisiri Sergueï Choïgou ka fɔla.Farajɛla lakandako tɔnba OTAN k’o bɛna a ko kɔrɔsigi.

Ganseli

Russie marabagaw k’u bɛna u ka sɔrasiw labɔ "Ukraine" ani "Crimée" dansɛw gɛrɛfɛ. 

Nka u ma perepere latigɛ nin sɔrasi ninnu bɛɛ le bɛna bɔ mara in la, walima minnu tara yen kɔsa in na, olu le bɛna u kɔseguin. 

A bɛ lɔgɔkun fila ɲɔgɔn bɔ "Ukraine" y’a lase ko "Russie" ye sɔrasi dɔw bila kana fara kɔrɔlenw kan "Ukraine" dansɛw la. "Russie" marabagaw yɛrɛ tun laban na k’o sɛmɛntiya wa ko sorasi ninnu bɛ yen degeli fɛɛrɛ dɔw le kosɔn. Nka o tɛ "Ukraine" ɲɛmɔgɔ hakilila ye, ko "Russie" bɛ ka "Ukraine" banbanciw le jukɔrɔmadondon. 

"Russie" sɔrasi ninnu labɔli mara in kɔnɔ, Volodymir Zelinsky, "Ukraine" ɲɛmɔgɔ y’o kibaruya kunbɛn nin nisɔndiya ye, nka k’o bɛna a ko lakɔrɔsi kɔsɛbɛ. 

A bɛ see don nataw la "Russie" ɲɛmɔgɔ Vladimir Poutine ni Zelinsky bɛ ɲɔgɔn lasɔrɔ ka kuma baranɲɔgɔnya kan jamana fila ninnu cɛ, nka min ye kɛlɛ kuma ye "Ukraine" kɔrɔn fɛ, Vladimir Poutine ko Zelinsky ka taa sigikafɔ kɛ nin banbanci ninnu yɛrɛ ye. 

Farajɛla lakandako tɔnba OTAN fana y’i kanbɔ.