Afghanistan: talibanw ye waati min di mɔgɔw labɔli la, o waati in bɛ ɲini ka ban

Etats-Unis ka donnita pankurun dɔ, o min bɛ ka bɔ ni mɔgɔw ye Afghanistan jamana na, Kaboul pankurunjigiso la.
Etats-Unis ka donnita pankurun dɔ, o min bɛ ka bɔ ni mɔgɔw ye Afghanistan jamana na, Kaboul pankurunjigiso la. AP - Senior Airman Brennen Lege

Afghanistan, halisa USA, Faransi ani Otan jamanaw bɛ ka taa ɲɛ n'u ka mɔgɔw labɔli ye jamana in kɔnɔ. Bɛnkan min b'u ni Talibanw cɛ o ye baaraw bɛɛ bɛ kuncɛ ka bɛn ni nin kalo tile 31 de ma. Nka kow tabolo b'a yira ko waati kofɔlen in tɛna se ka bato. Talibanw dun y'u kangari gwɛnlen de da.

Ganseli

Talibanw ka fanga tali ni bi cɛ Etats-Unis n'u dɛmɛbagaw sera ka mɔgɔ caman de labɔ Afghanistan, nka halisa a tɔ ka ca. O de la kunu Faransi kɔkanko minisiri Jean Yves le Drian y'a fɔ ko don dɔw kan ka fara waati kofɔlen kan yasa u ka baaraw ka se ka kɛ ka ɲɛ.

Allemagne marabaaw fana y'a lase k'u bɛ kumaɲɔgɔnyaw la ni Etats-Unis ni Turquie ye walasa Kaboul pankurunjigiso dayɛlenli ka to Aout kalo tile 31 kɔ, min b'a to u ka taga ɲɛ n'u ka baaraw ye.

Royaume UNIS jamana fana yt'o laɲini kelen de kɛ. USA yɛrɛ ka kunnafoniyaw la, ulu sera ka mɔgɔ ba binani ni fila de labɔ Afghanistan, Allemagne mɔgɔ ba fila kɛmɛ duuru, Royaume Unis ba duuru ni kɛmɛ wolonfila, Faransi ba kelen ni kɛmɛ fila.

Nin bɛɛ la Kaboul Pankurunjigiso falen de bɛ tɛ jama na halisa, olu bɛɛ de bɛ fɛ ka taga kabɔ Afghanistan. Talibanw yɛrɛ olu y'u tafɔ, ko tile kelen man kan ka fara waati kofɔlen in kan u ni Etats-Unis  ni ɲɔgɔncɛ. Nin bɛ ka kɛ kasɔrɔ Talibanw bɛ k'u ka fanga sinsin ka taa fɛ, kunu yɛrɛ u y'a lase k'u ka kɛlɛcɛw sera ka Panchir mara mɔgɔ murutilenw lamini.