Afghanistan, talibanw ye weele sama Etats-Unis wasabulon ma k'a k'u ka jamana sɔrɔ bulondaw dayɛlɛ

Afghanistan ka lasigiden, Suhail Shaheen Nations unies na.
Afghanistan ka lasigiden, Suhail Shaheen Nations unies na. © RFI/Nicolas Falez

O sɔrɔ siraw bɛɛ tun tugulen don Etas-Unis wasabulon fɛ, kabini talibanw ye fanga ta. Afghanistan mabagajɛnkulu ko n'o ma kɛ, ko gɛlɛya bɛ se ka bonya jamanadenw ma, foo ka se jamana kɔ kan.

Ganseli

Bataki cira Etats-Unis wasabulon ma, ka bɔ Afghanistan kɔkanko minisiri fɛ Amir Khan MUTAKI. Minisiri ko deguba min bɛ Afghanistan kan bii, k'o ye nafoloko degu de ye. Ale fɛ, ni koow tora nin cogo la, a sɛgɛn tina dan Afghanistan jamandenw dɔrɔn ma, bawo ko mɔgɔ caman bɛ sɔn ka jamana bila ka taga o yɛrɛ sɔrɔ yɔrɔ wɛrɛw la. 

A ka bataki kɔnɔ, minisiri MUTAKI ko ni Etas-Unis wasabulon b'a fɛ baaraɲɔgɔnya ka to senna jamana fila nunu ni ɲɔgɔn cɛ, ko foo a ka ɲaa filɛ k'a seen wuli ka bɔ Afghanistan ka sɔrɔ bondaw kan, baara ka kɛ n'a ye, ɲataga ni basigi ka sabati. 

Afghanistan ka waribonba, banque centrale, ka sɔrɔ, dɔlariwari miliyari kɔnɔtɔn ni tilan le balannin lo, Etats-Unis wasabulon ye minw sira tugu fɔlɔ, kabi talibanw senin fanga na. 

O kanma, nin y'a kalo caman de ye, jamana foorobabaarakɛlaw tɛ sara sɔrɔla, jamana ka tɔgɔla nafoloso, tɛ sera ka wari bɔ ka fɛɛn kuraw san ka na Afghanistan. Jamana wɛrɛw ye layidu caman minw ta talibanw ye, o te ka waleya, bawo caman be sigara ko talibanw ka marabagajɛnkulu ma janto jamanadenw bɛɛ la, ko musow ka hakɛ fana te ka labato.