Ukraine jamana kunkan, sigikafɔ min tun bɛ Russie ni faragwɛjamana tɔɔw cɛ, u ma se ka fosi ɲanabɔ
O siratigɛ la, jatiminɛkɛla dɔw bɛ k'u yɛrɛ ɲininga yala Ukraine koo tɛna kɛ sababu ye ka kɛlɛ lawuli Russie ni jamana dɔɔw cɛ wa?
A jɛnsɛnna :
Bii juma, Ukraine marabagajɛnkulu ka bɔlɔlɔ siraw bɛɛ tun murutira tuma dɔɔ ra, k'a sababu kɛ bɔlɔlɔkan ŋaniyajugubaarakɛlaw ka wale dɔɔw ye (Cyberattaque). Tiɲɛ lo, marabaga ko a ma kɔlɔlɔ lase olu ma, nka jatiminɛkɛla dɔɔw k'o yɛrɛ ye kɛlɛ faratijugu nin taamasiyɛ le ye.
Lɔgɔkun kelen sigikafɔw tɛmɛnin kɔfɛ, bɛnkan fɔsi ma sɔrɔ Russie ni jamana tɔɔw cɛ Ukraine koo ra. Vladmir POUTINE, Russie jamanaɲamɔgɔ k'a t'a fɛ Ukraine ka don OTAN jɛnkulu kɔnɔ, Etats-Unis k'olu mako ti Russie ka hakilinan fosi ra OTAN ka baaraw taabolo kan. Etats-Unis ko sigikafɔw le kolo ka kan giriya dɔɔw ka bɔ kɛlɛkɛminanw tali la ani sɔrasiw ka kɛlɛdegibaaraw.
Russie fana k'ale ma kuun ye sigikafɔw ra tuguni. Ale do jalakinin bɛ k'a ye sɔrasi baa kɛmɛ bila ka lɔ Ukraine donda ra. Nin bɛɛ le kanma, Melinda HARING, Etats-Unis jamana ka sɛgɛsɛgɛlikɛla dɔɔ ko faan fila ninnu ti se ka ɲɔgɔn famu ni kaan kan. Marie DUMOULIN, Russie jamana ka sɛgɛsɛgɛlikɛla dɔɔ ko, mɔgɔ si m'a lɔn nin koo nin bina laban cogo min na. Nin bɛɛ ra, ɲɔgɔnsama bi kɛra Ukraine min koo ra, faan fila si ti ka ale daa don kumaɲɔgɔnyaw ra.