Sénégal: Wasadenw ye tɔn "Commission Ad-hoc" sigi wasa ka fangasina Ousmane SONKO kiti

Ousmane SONKO, "Sénégal" fangasina.
Ousmane SONKO, "Sénégal" fangasina. SEYLLOU / AFP

Kunu tɔn min tɔgɔ "commission Ad-hoc" sigira sen kan wasadenbulon na. Nin tɔn in de bɛna sɛgɛsɛgɛliw kɛ, fangasina Ousmane Sonko  kan, n'a bɛna kɛ sababuye k’a ka wasaden jala b'a kan k'a kiti k'a ye binkaniwalen min kɛ npɔkɔtigi Adji Sarr kan.

Ganseli

"Sénégal" fabala, fɔɲɔgɔnkɔ kɛra wasadenw ni ɲɔgɔncɛ tuma min tɔn "commission Ad-hoc" tun bɛ sigi sen ka.

Ka da kan fangasina wasadenw y'a jira kɔ pɔlitikitɔn "PASTEF" ɲɛma Ousmane Sonko ka wasaden jala bɔli a kan k'u t'a la. U ko kititigɛla min tɔgɔ "procureur de la république" ye nɔminali sɛbɛn min bila Ousmane Sonko ma, a tɔgɔ ma fɔ a kɔnɔ. O sɛbɛn in kɔnɔ a k'a mɔgɔ dɔ nɔminɛnen dɔ binkani walenw ni mɔgɔ faga bagabaganiw ka ɲɛsi npɔkɔtigi Adji Sarr ma.

O la fangasina wasadenw fana y'a jira kɔ ko min mɔgɔ tɔgɔ ma fɔ nɔminali sɛbɛn in kɔnɔ, a mankan ni tɔn in ka sigi sen kan, ko kuma tɛ k'a ka wasaden jala bɔ a kan. O kama fangasina wasadenw ma sɔn tɔn in ka sigi sen kan, n'o ye "commission Ad-hoc "ye. Nka tɔn in kɔni sigira, wasaden 11 b'a kɔnɔ. Jɔ yɔrɔ fila dira fangasina wasadenw ka jɛkulu ma ani wasaden minnu n'u tɛ jɛkulu kɔnɔ wasadenbulon la, jɔ yɔrɔ kele dira u ma n'u bɛ weele "les non-inscrits" Faransikan na. Mɔgɔ 8 tɔw ye fanga mɔgɔw ye.

U wasaden 11 min sugandira tɔn in kɔnɔ u bɛna lakodɔn araba nata la, wasadenw ka ɲɔgonɲɛ sen fɛ wasadenbulon la. O kɔ fɛ u bɛna u ka kɔlɔsili baaraw daminɛ, walasa u ka fangasina Ousmane Sonko ka wasaden jala ka bɔ a kan, a ka se ka  kiti.