Niger: Tchad sɔrasi dɔw jalakilendon dilangan binkani na ka ɲɛsin muso dɔw ma

 G5 Sahel,sɔrasiw.
G5 Sahel,sɔrasiw. AFP/File

Tchad marabajɛkulu yɛrɛ ye kuma in sɛmɛtiya a ka dantigɛli sɛbɛn dɔ kɔnɔ wa ko ɲangili bɛna da sɔrasi minnu sen bɛ ko in na, ulu kan. 

Ganseli

Denmisɛnni san tan 11, muso furulen fila, kelen si bɛ taga san 23 la, dɔ in ye bɛ san 32 la, u cɛla dɔw yɛrɛ kɔnɔmadon.

"G5 Sahel" kɔnɔ Tchad sɔrasiw binna ninnu de kan. Adamadenw ka hakɛ lafasatɔn "CNDH" ka kuma lasela Amidou Talibi kafɔ la. A ko yɛrɛ muso duuru wɛrɛ, ulu sera ka purugutu ka bɔ sɔrasi binkani kɛla ninnu bolo.

Ni dɔrɔn tɛ, bin kɛra muso wɛrɛw kan, nka ulu maloyalendon ka sereya kɛ, u ka na lajɛ ni ɲɛ jugu ye u ka sigidaw la.

Amidou Talibi y'i sinsin a kan, ko jati Tchad sɔrasiw de ka baara ye ni kɛwale ninnu ye. A y'a dakan fana ko sɔasiw ninnu tagara bin muso dɔw kan f'u siso kɔnɔ, u furu cɛ yɛrɛ jɔlendon, u kɛlen kɔ k'u bagabaga n'u ka marifaw ye.

Nin ko in bɛ kɛra Tera dugu de kɔnɔ, Tillabery marala. Nka Tchad sɔrasiw ka ɲɛmɔgɔba ni Marabajɛkulu si ma ni kumakan ninnu sɔsɔ. Marabajɛkulu ka dantigɛli sɛbɛn kɔnɔ, a fɔra kɔni ko ɲangili bere bɛna ta ka ɲɛsin sɔrasiw walejugu kɛla ninnu ma. Tchad sɔrasiw nana Niger G5 sahel de tɔgɔla jatigɛwalekɛli la.