Tchad: jamanaden miliyɔn 7 de tun weelelendon kalatasow kɔnɔ kunu yasa k'u ka jamanaɲɛmaa sugandi

Tchad, jamanaɲɛmɔgɔkalataso dɔ kɔnɔ, mɔgɔw b'u ka kalata la.
Tchad, jamanaɲɛmɔgɔkalataso dɔ kɔnɔ, mɔgɔw b'u ka kalata la. © AFP - Gael COGNE

Cɛbɔ wɔrɔ de bɛ k'u sama jamana ɲɛmaa Idriss Deby Ittno ma. Ale b'a ka sarati wɔrɔna de nɔfɛ san bisaba kɔ fanga la. Nka ni kalata in na fangasina belebelew sen ma don a la. 

Ganseli

Fangasina dɔw tun ye weelekan bila k'o Tchad jamanaden si kana bɔ ka wote. Jamana ɲɛmaa Idriss Déby, a le kɛlen kɔ ka kalata kunu sɔgɔma, a fana ye weele bila ko Tchad jamanaden bɛɛ ka bɔ ka ta kalata bɛn ni basigi kɔnɔ.

K'o de ye bɛɛjɛfanga misaliya ɲuma ye. O kama lakanatigilamaaw tun bɔra ka caya fan bɛɛ. Nin de kama kunu surɔ fangaw y'u ka sewa jira, ka d'a kan ulu ka fɔla Tchad jamanadenw tugura ulu ka weele kan kɔ, k'u ma sɔn ka bɔ ka caya ka ta kalata.

Fangapolitikitɔn "Mouvement patriotique pour le Salut MPS" tɔndenw, ulu ye dɔwɛrɛ fɔ, u ko jaman yɛrɛ bɔra ka wote. Nin bɛɛ de b'a jira k'a fɔ kunu jamanaɲɛmaa kalata la Tchad, bɛɛ sigilendon ni Idriss Déby ka sebaya ye.

Nka ɲɔgɔn sɔsɔ bɛ jaman ko de nɔfɛ. Kalata in kɔni bɛɛ sera ka kɛ basigi kɔnɔ jamana in fan tan ani nani bɛɛ kɔnɔ, fo k'a bɔ yɔrɔ kelen na, Tchad faaba Ndjamena kinba dɔ kɔnɔ, mɔgɔ kulu dɔ ye kalata minɛw jeni.  

Cɛbɔ 16 de tun y'u kanbɔ ni kalata in na, nka jamana kirisoba ma sɔn mɔgɔ wolonfila ta ma, mɔgɔ saba wɛrɛ ulu y'u senbɔ u yɛrɛ ye. Fangasinaw la bele-bele Saley Kezago b'ola. Sisan kalata jabiw makɔnɔlendon ni Avril kalo tile 25.