Farafinna: "coronavirus" kɛlɛ fɛɛrɛw la, "Sénégal ni Rwanda" bɛ ɲɛma

Sénégal, bolocili nɔgɔyara ni korona bolocifura ye, i dan y'i ka bugunatigɛ sɛbɛn jira kɛnɛyaso dɔ la dɔrɔn, yasa k'i boloci.
Sénégal, bolocili nɔgɔyara ni korona bolocifura ye, i dan y'i ka bugunatigɛ sɛbɛn jira kɛnɛyaso dɔ la dɔrɔn, yasa k'i boloci. © AP/Leo Correa

Kabi ni koronabana bɛ diɲɛ kɔnɔ, jamanaw b'o cɛsirila halibi walasa k'a kɛlɛ. Ni seebajamanaw bɛ ɲɔngɔndan na bolocifura ko ra, farafin jamana fana b'o damana ko kɛra walasa ka bana in kɛlɛ u ka cogoya ra. O sababu la, cakɛda fila ye jamanaw faraɲɔgɔn kan koronabana kɛlɛ cogo ra. O cakɛdaw ka fɔ la Sénégal ni Rwanda ye ngwanaw ye korona ɲɛkɔrɔtigɛ fɛɛrɛw baaracogoya ra.

Ganseli

"Etats-Unis" ka kunnafoni di gafe "USA to day" de kɔnan ka Sénégal bila lɔyɔrɔ filana na jamana 36 ra,  minnu sera ka u cɛsiri koronabana kɛlɛli la diɲɛ kɔnɔn. A y'o kibaruya cari septembre kalo tile 6 san 2020 na.

Kunnafonidi gafe in ko Sénégal ye sebaya sɔrɔ jamanaba dɔw ɲɛ, i n'a fɔ "Etats-Unis" o min ye lɔyɔrɔ bisaba ni kelen na sɔrɔ.

Sénégal ye nin sɔrɔ a ka koronabana ɲɛkɔrɔtigɛ fɛɛrɛw le sababu ra. O fɛɛrɛ ye kunnafoni jɛlen carili ye koronabana ɲɛkɔrɔtigɛ cogo ra, ka dunanjigiso bila kɛnɛya baarakɛlaw bolokɔrɔ walasa ka mɔgɔ sigatɔw datugu yani sɛgɛsɛgɛliw ka kɛ o kan. Jamanaɲɛmaaw ye sɛgɛsɛgɛli fɛɛrɛ ta jona fana wa o jabi fana bɛ sɔrɔ jona.

"Etats- unis" halibi  cakɛda wɛrɛ ye jamanaw lalaɲɔngɔn dara. O jamanaw bɛ jamana kɛmɛ ɲɔngɔn bɔ. O cakɛda ye "Institut LOWY". A ka jabiw kɔ Rwanda jamana bɛ lɔyɔrɔ wɔɔrɔna na diɲɛ kɔnɔ, Togo gun ni b'o la, ka Tunisie jamana tugu o kɔ.

"Institut LOWY OF SYDNEY" y'a ka dantigɛliw kɛ ni jateminɛ minnu ye, o bɛ dan janvier kalo, san 2020. O ye jamana 100 jateminɛ,  jateminɛ cogo 6 kan. O jateminɛw ye banabagatɔ kuraw hakɛ ye, maa minnu fatura koronabana sababu ra, olu hakɛ, ani fɛɛrɛ minnu taara walasa mɔgɔw ka se k'o yɛrɛ sɛgɛsɛgɛ.

Diɲɛ kɛnɛya tɔnba, OMS, ma a ka fɛla fɔ fɔlɔ ni ko ninnu na.