Burkina: jamanaɲɛmaa Rock Kaboré ka fɛɛrɛ talenw jatigɛwale kɛlɛli la

Burkina Faso sɔrasiw ni farajɛla ta dɔw.
Burkina Faso sɔrasiw ni farajɛla ta dɔw. MICHELE CATTANI AFP

Burkina jamanaɲɛmaa Rock Kaboré ka fɛɛrɛ talenw na ka jatigɛwalekɛlaw kɛlɛ, sɔrasikɛlɛ kologiriman bɛ yen, an ko min ma "Opération militaire". O bayirika de bolodala Burkina. Kɛlɛ kologiriman fɔlɔ daminɛra san 2017. O si tɛ ka wasa kɛ. 

Ganseli

Kɛlɛ kologiriman fɔlɔ cɛman "Opération Panga" bɛ yen. O kɔrɔ ko mossikan na fangajira kɛlɛ. A kɛra Burkina ni Mali kɔnɔ. O kɔ kɛlɛ wɛrɛw i n' a fɔ, "Opération Otakuanu", san pɛrɛn, gulmance kan na, Opération Doofu, lili bɔin, fila kan na, walima Opération Hounè, hɔrɔnya, fula kan na, ale daminɛra mai kalo tile 5 tɛmɛnnen in na Saheli mara kɔnɔ. Nka a ma Solhan ka binkani in bali. Mamadou Savadogo ka hakilina y'o ye fana. Ale ye lakanakow dɔnbaga ye.

Mamadou Savadogo

Sahɛli mara dɔrɔn kɔnɔ, sɔrasi kɛlɛ 116 kɛra, kɛlɛ denw ani jamana wɛrɛw sɔrasiw ka baaraɲɔɲɔn kɛlɛw. Nka o ma jatigɛwalekɛlaw bali ka jamana fan kelen bɔsi lakanatigilamaaw la. O kɛlɛ ninnu cogo bɛnnen tɛ jatigɛwalew la, o jatigɛwalew ninnu bɛ yɛlɛma fana jɔnna ka kɛɲɛ ni fɛɛrɛ minnu jamanaw b'a ta u nɔfɛ.

Ka fara sɔrasi kɛlɛ kologirimanw kan, sasaliw ni laraweliw bɛ kɛ fana. Lamusalon tɛmɛnnen na, Burkina sɔrasiw y'a ladɔniya ko jatigɛwalekɛla 12 ɲɔgɔn fagara, sasali dɔ senfɛ Solhan mɔgɔfagaw kɔ. Nka kɛlɛ ninnu dɔrɔn tɛ se ka nani basigi ye Daouda Kinda ko tɛn. Ale bɛ jatigɛwalew sɛgɛsɛgɛli kalan la. 

Faransi jamanaɲɛmaa Emmanuel Macron tun y'a fɔ ko ni duguw ani yɔrɔminnuw bɔsila jatigɛwalekɛlaw bɔlɔ, sahɛli jamana marabaaw tɛ nani forobacakɛda ye k'o yɔrɔ tigiya ta. O kɔ jatigɛwalekɛlaw bɛ segin. O de bɛ ka kɛ Burkina sɔrasiw ka kɛlɛ kologirimanw kɔ, sereyaw la.