Tchad: musow tun bɛ wulikajɔ la ka kɛɲɛ ni muso-binkanni wɛrɛ ye

Ndjamena, Tchad faaba la, musow ka wulikajɔ ka ɲɛsin npogotigini dɔ ka binkani ma.
Ndjamena, Tchad faaba la, musow ka wulikajɔ ka ɲɛsin npogotigini dɔ ka binkani ma. © Aurélie Bazzara-Kibangula/RFI

Muso kɛmɛ ɲɔgɔn de bɔra kunu ntɛnɛ Ndjamena kiribulonba da la k’u ka ninsɔngoya jira mpokotigini dɔ ka binkanni ko la.

Ganseli

O tun tɔgɔ Meram, cɛ 3 de binna a kan ka tila ka taa a fili a kirinnen. O cɛ sabaw ye Tchad sorasi jalatigiba dɔw de denw ye. Hali n’o y’a sɔrɔ binkannikɛla ninnu minɛna, muso wulikajɔkɛlaw k’olu t’a fɛ u ka labilen tem i ko tɔw caman minnu ta kɛra o cogo la. Epiphanie Djianrang ye wulikajɔ in jusigibagaw dɔ ye. Na k’a lamɛn.

Epiphanie Djianrang

An y’a latigɛ k’a wuli k’an jɔ bawo a nege tɛ an la tugun wa an tun bɛ an dan la. Nin y’a san damadɔ ye an y’a jateminɛ ko musow kɛlen don dɛnkɛrɛfɛw ye, u bɛ bugɔ furuw kɔnɔ, dɔw bɛ faga. Muso binkanni misali caman de b’an bolo jango minnu kɛra musomani fitiniw la. A ko bɛ taa fanga la, nka an bɛ tila ka binkannikɛlaw ye kɛnɛ ma.

Wa a tigiw bɛ tila ka ko wɛrɛw kɛ. U bɛ na bagabaga yɛrɛ. Dɔ wɛrɛw fana kɛra, zenerali denw de binna dɔ kan, k’a ja ta ka tila k’a bila bɔlɔlɔ kan. An y’a ɲini k’a kuma fɔ nka a mɔgɔw ma minɛ halisa bawo ko Tchad fangatigibaw denw don. Nin y’a san 20 tu ye, an baw tun bɔra ka nin kuma kelen in fɔ, nka yamaruya ma di u ma, u bugɔra ka tila ka gaz ci u la.

Nka nin sen in wulikajɔ, anw ye yamaruya sɔrɔ ka bɔ kana minisiriso la. Polisiw yɛrɛ de k’an bilasira, wa an ye laɲiniw kɛ, an taara u di kiriko minisiriso la, k’a di minisiri yɛrɛ ma. Nka ni waati dɔ sera k’a sɔrɔ an ka laɲiniw ma sabati, an bɛ segin a kan fo kiri ka kɛ.