Algérie: jamana na, tɛgɛ sera ka da tasumakasaraw daan kan.

Algérie, tasumakasaraw, août kalo tile 13, san 2021, Toudja, wilaya Béjaïa maraw la..
Algérie, tasumakasaraw, août kalo tile 13, san 2021, Toudja, wilaya Béjaïa maraw la.. AP - Toufik Doudou

Kunu araba, mɔgɔ ladonbagaw ka cɛkɛda (Protection civile) y'a lase, ko tasumɛnɛyɔrɔw bɛɛ fagara. Tasuma in senfɛ, jalaki dara kanbelenin dɔ kan, k'a bɛ dɔɔ dɔn tasuma in jujɔn na. Mɔgɔw y'a bugɔ foo ka bɔnɛ a niin na. O kuma bɛ ɲini ka funteni wuli Algérie marabagaw ni Kabylie marabolo banbaanciw cɛ. 

Ganseli

Algérie, tasumakasaraw ye taari bayirika le halaki Kabylie mara ra. Mɔgɔ bikɔnɔntɔn ɲɔgɔn niin  tora a koo ra, o cɛma sɔrasi bisaba ni saba. Bololafɛn fana caman tiɲɛnna. Nka min ye Algérie jamanadenw tɔɔrɔ ka tɛmɛ a bɛɛ kan, o ye Djamel Ben Isamël ka saya ye. Kanbelenin nin jalakaira k'a ye tasuma don kongo ra, k'a bugɔ mɔgɔ dɔw fɛ, foo k'a faga.

O kɔfɛ, Algérie polisiw k'u ye sikananmɔgɔ  biwɔɔrɔ ni kelen minɛ, Polisiw ka fɔɔ ra, Kabylie mara lafasajɛnkulu (MAK, indépendantiste), ale ye wale nin kɛ. Olu fana ma bilakasuma kɔnɔ. Kunu araba, tɔɔn nin ka kumalasela, Aksel Ameziane ko nin ti fosi ye Algérie marabagaw fɛ, bɛnbɛnbɛn kɔ, ka MAK, indépendendiste tɔgɔ tiɲɛn. Ka se k'a koo lagwɛya, jɛnkulu k'a b'a fɛ, sira ka di jamana wɛrɛmɔgɔw ma, o ka sɛgɛsɛgɛli gwɛlɛn kɛ, ka se ka tasumakasaraw fana jubɔyɔrɔw lɔn.

MAK, Indépendentiste ye jɛnkulu min bi kɛlɛ ra kabi saan 2001, ko ka Kabylie mara bɔ a daan na. O laɲini ti taa Algérie marabagaw jiminsira fɛ. Nin y'a saan naani ye, olu ye jɛnkulu nin jati ka fara jatikɛwalekuluw kan.