Kunu tun y'a san kelen dafanin ye, kɛlɛ wulila Tigré mara kɛlɛcɛw ni Ethiopie tɔ taw cɛ
A jɛnsɛnna :
San kelen, kɛlɛ tɛ ka kɔtigɛ wa balawu bɛ ka juguya ka taa a fɛ. Nin kɛlɛ nin bɛ mɔgɔ hakili jigi a ɲɔgɔnna wɛrɛ la, min kɛra san 1991. O tun ye mɔgɔ bayirika de bɔnɛ u niin na fan fila bɛɛ fɛ. O yɛrɛ de kanma, France jamanaden Gérard PRUNIER, ɲininikɛla don France koɲaɲinicɛkɛsa la CNRS. Ale ko mɔgɔw ma farati, ko ko kɔrɔ tɛmɛlen bɛ sɔn ka segi tuguni.
San 1991 na, n'aw m'a famu, nin y'a saan bisaba dafanin ye, Tigré banbaanciw ye maramafɛnw ta, ka don Addis Abeba ka Ethiopie fanga bɔsi. O kɔfɛ o ma sɔn k'a bila tuguni fɔ o ka ɲamɔgɔ Meles zenawi ka saya saan 2012. O dimi tora siya tɔw ra, k'a mankan juguya kosɔbɛ. O le kanma, Gérard ɲininikɛla min tun sigira Addis Abeba tumajan, ale ko ko fila ninnu ka surun ɲɔgɔn na.
Gérard PRUNIER
Koo min kɛra nin waati nin na, a bɔlen bɛ saan 1991 taa fɛ, hali fosi t’u bɔ ɲɔgɔn na, sabu mɔgɔ min bi banbaanciw kuntigiya la bii, ale de tun ye dugu in bɔsi saan 1991 ka bɔ communistes bolo. Ale cɛ kelen in don, Général Tsadkan [Gäbrä Tensaé], ale min kɛra Ethiopie sɔrasiw ɲamɔgɔba waati kuntaalajan kɔnɔna na, n’a ye banbaanciw kuntigi ye bii.
A tile damanin ye bii ye, TPLF banbaanciw b'a ra, k'olu bina don Addis Abeba hali a ti mɛɛn. Aby Ahmed, Ethiopie marabagajɛnlulu ɲamɔgɔ fana k'ale bina o susu foo k'o ko o ka joli la. Nin bɛɛ ra, Gérard PRUNIER ko fan fila ninnu si man kan ka ɲina kunu taa kɔ//
Gérard PRUNIER
N’u b’a fɛ Ethiopie ka taga siraɲuman kan, a tɛ bɛn cogo si la, u ka saan 1991 taa ɲɔgɔn kɛ, sabu fɛɛn minw bɔlɛn bɛ ɲɔgɔn fɛ, olu de bɛ wolo fɛɛn sugu kelen na, a koo tɛ na kɛ fosi ye foo min tun kɛra ka tɛmɛ. o kɔrɔ ko siya kelen dɔ de bɛna fanga minɛ ka kɛ a yɛrɛ taa ye. O don man kan. Jango yɛrɛ ko Meles Zenawi ka saya kɔfɛ saan 2012 la, gɛlɛya in bɛɛ sɔrɔra, tigrékaw ka mara kɛcogo kɔnni de fɛ jamanadenw bolo.
Bagabaliw kɔfɛ, Etats-Unis ka lasigiden min bi Ethiopie fana y'a yira ko abada, olu tina sigi k'a filɛ banbaanciw ka don Adis Abeba. An m'a lɔn n'a ka kuma mɛntulo bina sɔrɔ banbaanciw fɛ.