Gambie: Adama Barrow de ye see sɔrɔ kalata jabi labanw na

Gambie jamanakuntigikalataw jabi labanw bɔra  kunu nɛgɛ kaɲɛ 21h 15 waati la. Adama Barrow de y'olu seebaya sɔrɔ. O kɔfɛ an'a kanubaaw tun bɛ lajɛrɛ dɔ la.

Adama Barrow, Banjul, Gambia faaba la, jamanakuntigikalata jabiw bɔlen kɔ, Décembre kalo tile 02, san 2021. John Wessels AFP/Archivos

Nin ye Gambie kalata koɲɛbɔso ɲɛmaa Elhadji Alioun N'diaye kɛto ye ka fɔko Adama Barrow ye kalataw seebaya sɔrɔ.

O ye ninsɔndiya dan ye cɛ nin kanubaaw fɛ.

Olu kunsinen don jamana ɲɛmaayaso la u bɛna ɲɔgɔnkunbɛn ye lajɛrɛ kɛnɛ dɔ kan.

Babacar Tall ye Gambie den ye min sigilen don Allemagne jamana kan. Cɛ in ka saki, sanmara, doroki, fugula fɔ k'a tabila "café" min kasi la, Adama Barrwo de ja bɛ olu bɛɛ kan.

Nin ye fɛn kura ye, kalataw kɛla jɛya kɔnɔ. N'y'a ye ko yɛlɛma nin ka kan ka kɛ Gambie jamana kɔnɔ wa fana Adama Barrow ye Gambie jamana kanu o de y'a to anw Gambie jamana den minni bɛ ko kan, an y'a cɛsiri wasa Adama Barrow ka kalata ninni seebaya sɔrɔ.

Awa Mane fana tun bɛ a kɛnɛ kan.

Ninsɔnjalen don kɔsɔbɛ, bɛ Allah deli a ka sii ni kɛnɛya di an ka jamanakuntigi ma. Allah kana kɛ a ka an jigitigɛ. An ka jɛn ka Gambie jamana dilan. Gambie y'an bɛɛ ka jamana Gambie. An k'an bolo di ɲɔgɔn ma ka jamana in dɛmɛ.

 Nin ye Adama Barrow kɛlen ye Gambie ɲɛmɔgɔ  wa a bɛna san duuru de kɛ y'ani kalataw wɛrɛw ka bolo da.  Kɛmɛ sara la mɔgɔ 52 ɲɔgɔn de ye kalata a ye nka fangasinaw y'olu jabiw sɔsɔ.