CAF-MKUTANO

Viongozi wa soka wakutana nchini Morocco kumwidhinisha Motsepe kuwa rais mpya wa CAF

Mpira, unapendwa sana barani Afrika
Mpira, unapendwa sana barani Afrika AFP/Archives

Viongozi wa mchezo wa soka kutoka mataifa 54 ya bara Afrika, wanakutana mjini Rabat nchini Morocco kwenye mkutano wao mkuu kujadili masuala mbalimbali yanayohusu mchezo huo.

Matangazo ya kibiashara

Kikubwa ni kumwidhinisha Patrice Motsepe kuwa rais mpya wa Shirikisho la soka barani Afrika.

Bilionea huyo raia  wa Afrika Kusini, na mmiliki wa klabu ya Mamelodi Sundowns, hana mpinzani baada ya wapinzani wake watatu  Augustin Senghor, Jacques Anouma na Ahmed Yahya kujiondoa siku chache kuelekea kwenye uchaguzi huo.

Hatua hiyo ilikuja baada ya Shirkisho la soka duniani FIFA, kupendekeza kuwa wagombea hao wamwachie Motsepe nafasi hiyo huku Senghor,  Yahya wakipendekezwa kuwa  manaibu rais wa CAF na Anouma kuwa mshauri wao mkuu.

Motsepe anachukua nafasi ya Ahmad Ahmad ambaye wakati wa utawala wake, alifungiwa kutojihusisha na masuala ya soka na FIFA kwa miaka mitano baada ya kupatikana na kosa la kukiuka maadili ya uongozi wa soka.

Hata hivyo, Mahakama ya Kimataifa kutatua mizozo ya michezo ilimpunguzia Ahmad raia wa Madagascar adhabu hiyo na kumfungia sasa  kwa miaka miwili, baada ya kusikiliza rufaa yake.

Historia ya viongozi wa soka barani Afrika:

1957   Abdel Aziz Abdallah Salem (Misri)

1958   Abdel Aziz Moustafa (Misri)

1968   Abdel Halim Muhammad (Sudan)

1972   Yidnekatchew Tessema (Ethiopia)

1987   Abdel Halim Muhammad (Sudan)

1988   Issa Hayatou (Cameroon)

2017   Ahmad Ahmad (Madagascar)

Kumbuka: Constant Omari Selemani kutoka Jamhuri ya Kidemokrasia ya Congo amekuwa akikaimu urais wa CAF kwa siku 67, tangu  Novemba  23, 2020 baada ya  Ahmad kufungiwa na FIFA.